Nisma e Qeverisë për Sigurimin e Banesave
Nisma e qeverisë për të bërë me detyrim sigurimin e banesave sjell në vëmendje tipologjinë e banesave që kemi në treg. Të dhënat e Censit tregojnë se janë 730 mijë banesa të banuara që mund të jenë potencial për sigurimin nga tërmeti.
Opinioni i Ekspertëve
Diana Bardhi, pedagoge në fakultetin e inxhinierisë së ndërtimit, e ftuar në emisionin E-ZONE, tha se mbështet idenë e një sigurimi me detyrim, por primi duhet të jetë i përballueshëm dhe i bazuar në analizë risku.
- “Nuk mund të vazhdohet me idenë se shteti do të mbulojë çdo dëm që vjen nga fatkeqësitë natyrore.”
- “Shuma e sigurimit duhet të jetë e përballueshme.”
- “Pallatet e para viteve ’90 mbeten më me risk të lartë.”
Bardhi theksoi se aktualisht nuk kemi harta sizmike të rifreskuara që të tregojnë saktë zonat më me risk të lartë sizmik. Më shumë se gjysma e mbi 1 milion banesave të regjistruara nga censusi janë pallate të ndërtuara para viteve 90, të cilat janë më të riskuara nga tërmetet.
Ndërtimet e Dekadës 1990-2000
“Në dekadën 1990-2000 kemi ndërtime të kryera pa kriter, të pacertifikuara dhe të pakolauduara, pasi janë bërë nga “ustallarë” dhe në zona që nuk duhej ndërtuar,” sqaroi Bardhi. Edhe këto objekte që i përkasin kësaj dekade konsiderohen me risk sizmik.
